طريقة عمل الفطير المشلتت الفلاحى الاقتصادى فاطمة ابو حاتى

 السلام عليكم ورحمه الله وبركاته..

النهارده جايبالكم وصفة إنما ايه حلوة اوى وهتعجبكم كلنا بنحبها كبار وصغار بس مش بنعرف نعملها..

الفطير المشلتت الفلاحي المصري :

احلي فطار بالعسل الابيض او الاسود والطحينه وحتة جبنة قديمه 

الطريقة والمقادير :

كيلو دقيق

ملح

كوبين و نصف ماء تقريبا

بنعجن كويس جدا حوالي تلت ساعة لما العجينة تمط 

و نكورها كور متساوية في حجم البرتقالة تقريباً و ندهنها زيت ونتركها ترتاح لفترة من ساعة لتلات ساعات و يستحسن ليلة كاملة

و ندهن الرخامة زيت و نفرد كورة كويس و ندهنها سمنة بلدي و نطبقها ظرف

و الكورة الثانية نفردها جيداً و ندهنها سمنة بلدي طبعا كل مازودنا الكمية كانت احلى و نضع فيها الظروف الاول و ندهن و نطبق عليه ظرف تاني و الكورة التالتة نفردها و ندهنها و نحط اللي طبقناهم بداخلها و هكذا لما نخلص تلات او خمس كور حسب الحجم اللي عايزينه

و نترك الفطيرة ترتاح و بعدين نفردها و تدخل فرن ساخن جدا لمدة ربع ساعة فقط حتى لا تجف او تتسوى على البوتاجاز من فوق مع مراعاة تغطيتها و تقليبها على الجهتين واول ماتنزل من على النار تتغطى عشان تفضل طرية ..

ألف هنا..